LACREME NAPULITANE
(L. Bovio - F. Buongiovanni)

 

Mia cara madre sta pe' trasì Natale,

e a stà luntano cchiù me sape amaro

Comme vurria allumà duie o tre biancale

comme vurria sentì nu zampugnaro

A 'e ninne mieie facitele 'o presepio

e a tavola mettite 'o piatto mio;

facite, quanno è 'a sera d' 'a vigilia

comme si mmiezo a vuie stesse pur'io

E nce ne costa lacreme st'America

a nuie napulitane...

Pe' nuie ca nce chiagnimo 'o cielo 'e Napule

comme è amaro stu ppane!

 

Mia cara madre che ssò, che ssò 'e denare?

Pe' chi se chiagne 'a patria nun so' niente

Mo tengo quacche dollaro, e me pare

ca nun sò stato maje tanto pezzente!

Me sonno tutte 'e notte 'a casa mia

e d' 'e ccriature meie ne sento 'a voce

ma a vuie ve sonno comme a 'na "Maria"

cu 'e spade 'mpietto 'nant' 'o figlio 'ncroce

E nce ne costa lacreme st'America

a nuie napulitane...

Pe' nuje ca nce chiagnimmo 'o cielo 'e Napule

comme è amaro stu ppane!

 

M'avite scritto che Assuntulella chiamma

chi e sta luntana e l'ha lassata ancora

Che v'agia di? Si 'e figlie vonno 'a mamma

facitela turnà chella "Signora"

Io no io me ne resto fore

E resto a faticà pe' tutte quante;

j' c'aggio perzo patria, casa, e onore,

j' so' carne 'e maciello: so' emigrante!

E nce ne costa lacreme st'America

Pe' nuje ca nce chiagnimmo 'o cielo 'e Napule

comme è amaro stu ppane!

 

 

Il testo è rigorosamente quello cantato dal vivo